පාර්ලිමේන්තුව විසින් සම්මත කරනු පිණිස ප්‍රධාන නීති සහ සංශෝධන නීති කෙටුම්පත් කිරීම සහ උපකාරක නීති ප්‍රතිශෝධනය කිරීම සඳහා අමාත්‍යාංශ සහ දෙපාර්තමේන්තුවලින් ඉල්ලීම් ඉදිරිපත් කිරීමේ දී අනුගමනය කළ යුතු කාර්ය පටිපාටිය
1. පනත් කෙටුම්පතක් පිළියෙල කිරීම සඳහා නීති කෙටුම්පත් සම්පාදක වෙත අදාළ අමාත්‍යාංශ ලේකම් විසින් ලිඛිතව ඉල්ලීමක් කළ යුතු අතර, එම ඉල්ලීම සමග මතු දැක්වෙන ලේඛන ඉදිරිපත් කළ යුතු ය:-
- යෝජිත පනත් කෙටුම්පතට පාදක වන ප්‍රතිපත්තිය දක්වන එකී පනත් කෙටුම්පත පිළියෙළ කරනු පිණිස අමාත්‍ය මණ්ඩල අනුමැතිය අපේක්ෂා කරන ලද අමාත්‍ය මණ්ඩල සංදේශය;
- එම සංදේශයට අදාළ අමාත්‍ය මණ්ඩල තීරණය; සහ
- පනත් කෙටුම්පත පිළියෙළ කිරීම පහසු කෙරෙන පසුබිම් තොරතුරු ඇතුළත් සෙසු අදාළ ලේඛන
2.ඉන් අනතුරුව, නීති කෙටුම්පත් සම්පාදක විසින් යෝජිත නීතිය පිළිබඳ මූලික පනත් කෙටුම්පතක් (ඉංග්‍රීසියෙන්) පිළියෙල කර නිරීක්ෂණ සඳහා එකී පනත් කෙටුම්පත (ඉල්ලීම කරනු ලබන) අමාත්‍යාංශය වෙත ඉදිරිපත් කරනු ලැබේ.
3. මූලික පනත් කෙටුම්පත අමාත්‍ය මණ්ඩලය විසින් තීරණය කරන ලද ප්‍රතිපත්තියට අනුකූල වන බවට ඉල්ලීම කරනු ලබන අමාත්‍යාංශය විසින් අවසන් වශයෙන් සනාථ කරනු ලැබූ පසු නීති කෙටුම්පත් සම්පාදක විසින් අදාළ පනත් කෙටුම්පතේ අවසන් කෙටුම්පත නීතිපතිවරයාට ද පිටපතක් සහිතව ඉල්ලීම කරනු ලබන අමාත්‍යාංශය වෙත යැවීමට කටයුතු කරනු ලැබේ.
4. අනතුරුව, නීතිපතිවරයා විසින් ආණ්ඩුක්‍රම ව්‍යවස්ථාවේ 77 වන ව්‍යවස්ථාවේ විධිවිධානවලට අනුකූලව පනත් කෙටුම්පතෙහි ව්‍යවස්ථානුකූලභාවය පිළිබඳව සිය නිරීක්ෂණ ඉදිරිපත් කරනු ලැබේ. සිය මතය අනුව පනත් කෙටුම්පතෙහි විධිවිධානවලින් -
- ආණ්ඩුක්‍රම ව්‍යවස්ථාවේ විධිවිධාන උල්ලංඝනය වීමක් සිදු නොවන විට දී නීතිපතිවරයා විසින් ඒ බවට සහතිකයක් නීති කෙටුම්පත් සම්පාදකට ද පිටපතක් සහිතව ඉල්ලීම කරනු ලබන අමාත්‍යාංශය වෙත නිකුත් කරනු ලැබේ; නැතහොත්
- ආණ්ඩුක්‍රම ව්‍යවස්ථාවේ යම් විධිවිධානයක් උල්ලංඝනය වීමක් සිදුවන විට දී, නීතිපතිවරයා විසින් ඒ බවට සිය නිරීක්ෂණ නීති කෙටුම්පත් සම්පාදකට ද පිටපතක් සහිතව අදාළ අමාත්‍යාංශය වෙත ඉදිරිපත් කරනු ලැබේ. පනත් කෙටුම්පතට එම සංශෝධන කරනු ලැබූ විට නීතිපතිවරයා විසින් එකී පනත් කෙටුම්පතෙහි විධිවිධානවලින් ආණ්ඩුක්‍රම ව්‍යවස්ථාවේ කිසිදු විධිවිධානයක් උල්ලංඝනය නොවන බවට සහතිකයක් නිකුත් කරනු ලැබේ.
5. නීතිපතිවරයා වෙතින් එකී සහතිකය ලද විට, නීති කෙටුම්පත් සම්පාදක විසින් පනත් කෙටුම්පතෙහි සිංහල හා දමිළ පිටපත් ඉල්ලීම කරනු ලබන අමාත්‍යාංශය වෙත ඉදිරිපත් කරනු ලැබේ. නීති සංශෝධනය කිරීමේ පනත් කෙටුම්පත් සම්බන්ධයෙන් වන විට නීතිය බලපෑමේ ප්‍රකාශයක් ද මේ අවස්ථාවේ දී භාෂාත්‍රයෙන් අමාත්‍යාංශය වෙත ඉදිරිපත් කරනු ලැබේ.
6. ඉල්ලීම කරනු ලබන අමාත්‍යාංශය විසින් අනතුරුව පනත් කෙටුම්පත භාෂාත්‍රයෙන් ම අමාත්‍ය මණ්ඩලය වෙත ඉදිරිපත් කරමින් එය ගැසට් පත්‍රයෙහි II වන කොටසෙහි පළ කිරීමටත්, පාර්ලිමේන්තුව වෙත ඉදිරිපත් කිරීමටත් අනුමැතිය ඉල්ලා සිටිනු ලැබේ. මෙම අවස්ථාවේ දී කෙටුම්පත් කළ නීතියට තවදුරටත් සංශෝධන අවශ්‍ය යයි අමාත්‍ය මණ්ඩලය විසින් තීරණය කළහොත්, අමාත්‍යාංශය විසින් භාෂාත්‍රයෙන් වූ පනත් කෙටුම්පතේ පිටපත් ද, නීතිය බලපෑමේ ප්‍රකාශයක් ඇතොත්, එය ද සමග, අදාළ අමාත්‍ය මණ්ඩල තීරණය, අදාළ සංශෝධන සිදු කරනු පිණිස නීති කෙටුම්පත් සම්පාදක වෙත යොමු කළ යුතු ය.
7. 6 වන ඡේදයේ සඳහන් තත්ත්වය පැන නැගුණහොත්, එවිට 3, 4 සහ 5 වන ඡේදවල දක්වා ඇති කාර්ය පටිපාටිය යළි අනුගමනය කරනු ලැබිය යුතු ය.
8. අමාත්‍ය මණ්ඩලය විසින් පනත් කෙටුම්පත රජයේ ගැසට් පත්‍රයෙහි පළ කිරීම අනුමත කරනු ලැබු විට, අමාත්‍යාංශය විසින් පනත් කෙටුම්පත භාෂාත්‍රයෙන් ම රජයේ මුද්‍රණාලයාධිපති වෙත ඉදිරිපත් කළ යුතු ය. පනත් කෙටුම්පත පළමුවෙන්ම රජයේ ගැසට් පත්‍රයෙහි අතිරේකයක් ලෙසින් පළ කරනු ලබන අතර, භාෂාත්‍රයෙන් මුද්‍රණය කරනු ලැබූ කෙටුම්පත අවසන් සෝදුපත් කියවීම සහ අනුමැතිය සඳහා මුද්‍රණාලයාධිපති විසින් නීති කෙටුම්පත් සම්පාදක වෙත යවනු ලැබේ.
9. පනත් කෙටුම්පත රජයේ ගැසට් පත්‍රයෙහි පළ කරනු ලැබූ විට ආණ්ඩුක්‍රම ව්‍යවස්ථාව ප්‍රකාර එය පළ කරනු ලැබූ දිනයෙන් දින 14 ක් ඉකුත් වීමෙන් පසුව, එය පාර්ලිමේන්තුවේ න්‍යාය පත්‍රයට ඇතුළත් කළ යුතු ය. පාර්ලිමේන්තුව වෙත ඉදිරිපත් කිරීමෙන් (පළමුවර කියවීමෙන්) පසුව පාර්ලිමේන්තුව විසින් එය පනත් කෙටුම්පතක ස්වරූපයෙන් මුද්‍රණය කරන මෙන් පාර්ලිමේන්තු මහලේකම්වරයා වෙත නියම කරමින් එයට අංකයක් ලබාදෙනු ඇත. මෙහි දී පිටකවරයේ පෙනුමෙහි පමණක් වෙනසක් සිදුවන අතර, පනත් කෙටුම්පතට හරයාත්මක ව කිසිදු වෙනසක් සිදු කරනු නොලැබේ.
10. පනත් කෙටුම්පතක් පාර්ලිමේන්තුවේ න්‍යාය පත්‍රයට ඇතුළත් කරනු ලැබූ විට එය දෙවැනි වර කියවීමේ විවාදය සඳහා දිනයක් (පනත් කෙටුම්පත ඉදිරිපත් කරනු ලැබූ දින සිට දින හතකට කලින් නොවන දිනයක්) නියම කරනු ලැබේ. එම කාලසීමාව ලබා දී ඇත්තේ යම් පුරවැසියකුට එම පනත් කෙටුම්පත ශ්‍රේෂ්ඨාධිකරණය ඉදිරියේ අභියෝගයට ලක් කිරීම සඳහා ය. විවාදයට භාජනය කෙරෙන කරුණු සම්බන්ධයෙන් පැන නගින යම් වෙනස් කිරීම් කාරක සභා අවස්ථා සංශෝධන මාර්ගයෙන් සිදු කරනු ලැබිය හැක්කේ දෙවැනි වර කියැවීමෙන් පසුව පැවැත්වෙන පනත් කෙටුම්පතේ කාරක සභා අවස්ථාවේ දී ය. අමාත්‍ය මණ්ඩලය විසින් මුල් අවස්ථාවේ දී අනුමත කරනු ලැබූ ප්‍රතිපත්තියට බැහැරව අලුතින් කිසිදු කරුණක් කාරක සභා අවස්ථා සංශෝධන මාර්ගයෙන් ඇතුළත් කරනු නොලැබිය යුතු ය.